Vöerwuort
Wat is Ossenbrügger Platt? Et is ganz wat Besünneret! Et is ewwat hatter, oawer auk vull klöeriger (farbiger) oss de änneren Sprauken. Use Platt is äin Stücke Kultur van use Häimoat un mot erhaulen wäerden. Nu is dat sau met olle Plattsprauken: Et giff kien Duden un kien Brockhuus, woa me naukieken kann, woa wat schriewen wett, orre wat ewwat bedütt. Jederäin kann säggen un schriewen, wat häi will und dat doat de Schriewers auk. Jederäin häff sien äigenen Duden in sien Koppe. Doabi is use Platt sauwisau ewwat unnerschäitlick in jeden Duorp. Saugoar bi de unnerschäitliken Minsken is de Sprauke äin lüttket biätken änners, güst sau, van wäcke Minsken häi dat Plattküerden läehrt häff. Oawer dat Wunner doabi is, olle vostoaht sick und dat is dat Wichtigste doabi.
Düt Bouk is blauts äin Bispell, wo me in use Giegend, rund ümme Ossenbrügge küert. Jederäin kann dat auk äin biätken affännern. Ick häwwe mi den Riepe to’n Vörbelt nuohmen, dat wöe äin Schoulmester ut Ossenbrügge, de viäl un wunnerboar Ossenbrügger Platt schriewen häff. Van düssen Riepe häwwe ick auk äin Gedicht in dütt Bouk affdrucket. De Liäser van dütt Bouk schall sien Spoaß doamet häbben. Dat wünschke ick olle van Hatten.
Jugge Klaus Dreyer